Gimandoan sa Pre-Trial Chamber sa International Criminal Court (ICC) ang pagpatuman og medical examination kang kanhi Pangulong Rodrigo Duterte. Ang maong sugo gitumong aron masuta ang kapasidad ni Duterte nga makapadayon ug makasalmot sa pre-trial proceedings, lakip na ang confirmation of charges batok kaniya.
Ang desisyon misunod sa serye sa deliberasyon sa Pre-Trial Chamber I, diin nagtudlo usab kini og tulo ka medical experts nga mopahigayon sa eksaminasyon. Ang Chamber gilakip nila Judge Iulia Antoanella Motoc, Judge Reine Adélaïde Sophie Alapini-Gansou, ug Judge María del Socorro Flores Liera.
Gimanduan usab sa Chamber ang Registry nga mangolekta ug motugyan sa kumpletong medical record sa kanhi presidente ngadto sa panel sa mga independent experts, nga gilangkuban og forensic psychiatrist, neuropsychologist, ug geriatric and behavioral neurologist.
Gilauman nga ang mga eksperto magpahigayon og rekomendasyon alang sa espesyal nga mga paagi aron masiguro ang patas ug husto nga pagdungog sa kaso batok kang Duterte. Gisiguro sa ICC nga mahatag ang tanang record sa dili pa moabot ang Oktubre 31, samtang napalangan ang confirmation of charges hearing kaniadtong Setyembre 23 tungod sa hangyo sa depensa.