Gitutokan karon sa Bukidnon Provincial Government ang hugot nga pagbantay ug pagpatuman sa mga sumbanan batok sa African Swine Fever kon ASF aron malikayan ang pagsulod ug pagkaylap sa maong sakit sa lalawigan.
Sa pakighinabi sa Bombo Radyo Malaybalay kang Dr. Kharinine S. Escasinas, Acting Provincial Veterinarian sa Bukidnon Provincial Veterinary Office, gibutyag niini nga pinaagi sa Veterinary Mobile Regulatory Provincial Task Force gipatuman karon ang hugot nga mga inspeksyon ug operasyon kabahin sa suporta sa probinsyal nga ordinansa nga nagpunting sa pagpugong ug pagmitigar sa ASF.
Sumala ni Dr. Escasinas, adunay nadawat nga mga taho kabahin sa pagsulod sa mga produkto sa baboy nga gikan sa gawas sa Bukidnon, nga posibleng magdala og risgo sa kahimsog sa industriya sa hog raising sa lalawigan.
Tungod niini, padayon ang pagpatuman sa functional inspection ug lakip na ang pagkumpiska sa mga illegal nga produkto sa baboy.
Gipasidan-an usab niini, nga ang mga masakpan nga mosupak sa ordinansa silotan sumala sa gibug-aton sa kalapasan.
Kung pabalik-balik na ang paglapas ug padayon ang pagsupak sa mga sumbanan, ang kaso iendorso na sa Legal Office sa probinsya alang sa tukmang aksyon.Â