Pormal nang gipadala ang Notice to Respondent sa House Committee on Justice kang Vice President Sara Duterte kalabot sa duha ka verified impeachment complaints batok kaniya.
Sa abiso nga may petsang Marso 4, 2026 nga gipadala sa Office of the Vice President sa Mandaluyong City, gimandoan si Duterte nga magsumite og verified answer sulod sa 10 ka adlaw nga dili na mahimong palugwayan, subay sa House rules sa impeachment proceedings.
Sumala sa komite nga gipangulohan ni Rep. Gerville “Jinky Bitrics” Luistro, nakit-an nga sufficient in substance ang mga reklamo.
Ang duha ka reklamo gisaka nila Joel Saballa ug Atty. Nathaniel G. Cabrera.
Gipasidan-an usab sa komite nga kon mapakyas si Duterte sa pagsumite og tubag sulod sa gitakdang panahon, isipon kini nga pagbiya sa iyang katungod sa pagtubag ug paga-ispon nga pagdumili sa mga alegasyon.
Nadawat na sa Office of the Vice President ang maong abiso alas-10:44 sa buntag niadtong Marso 5, 2026. Subay sa patakaran sa Kamara, kinahanglan una magsumite og verified answer ang respondent sa dili pa magpadayon ang komite sa sunod nga yugto sa deliberasyon sa mga reklamo.
Kahinumduman, nga gideklara sa House Justice Panel nga “sufficient in form and substance” ang duha ka impeachment complaint pinaagi sa botong 54 pabor ug usa ang misupak.
Sumala ni Representative Isabelle Zamora, nga usa ra ka sukdanan ang gigamit sa komite sa paghusay sa mga impeachment proceedings.
Gipanghimakak niini ang alegasyon nga lahi ang standards nga gigamit batok kang Presidente Ferdinand Marcos Jr. ug Bise Presidente Sara Duterte, ug giklaro nga ang desisyon sa komite nakabase sa recital of facts ug mga ebidensiya sama sa dokumento, resibo, ug testimonya nga giendorso sa mga kongresista