Gipagawas sa mga ooridad sa Manchester, England ang hinungdan sa kamatayon ni kanhi world boxing champion Ricky Hatton.
Base sa imbestigasyon, ang 46-anyos nga boksidor mikutlo sa iyang kaugalingong kinabuhi.
Matud ni Alison Mutch, ang senior coroner sa Manchester South, kansa nanguna sa imbestigasyon nga ang patay’ng lawas sa boksidor nakaplagan nga nagbitay.
Una nang miluwat ang manager niini nga si Paul Speak, nga ang boksingero nakit-an nga wala’y panimuot sa iyang balay sa Hyde, Greater Manchester, kaniadtong Setyembre 14.
Kaniadtong tuig 2007, una kining napilid ni US boxing champion Floyd Mayweather, diin nakaguba sa iyang limpyo nga rekord nga 43 ka daog.
Miretiro kini sa boksing kaniadtong 2012 nga may 45 ka daog ug tulo ka pildi.
Kahinumdoman nga niadtong miaging semana gilubong na si Hatton nga gitambongan sa pipila ka sikat nga mga boksidor sama nila ni Tyson Fury ug Frank Bruno.