Gilaoman karon nga masugdan na sa Hanabana Construction and Equipment karong tuiga ang pagsuplay sa tubig ngadto sa mga kabalayan sa pipila ka barangay sa ning syudad sa Malaybalay.
Sa eksklusibong pakighinabi sa Bombo Radyo Malaybalay kang Ramonito N. Sagocsoc, Bise-Presidente Hanabana Construction and Equipment, gibutyag niini naghikay na sa tanang kinahanglanong permits ang kompanya aron masugdan ang construction ug aron makakuha og otorisasyon alang sa pag-operate.
Sumala niini, gilaoman nga karong kwarter masugdan na ang aktuwal nga mga kalihokan sa construction ug gilaoman usab nga makasugod na ang pagdistribute sa tubig ngadto sa mga kabalayan sulod niining tuiga.
Matud pa niini, ang inisyal nga coverage sa pagsuplay sa tubig maglakip sa tulo ka barangay, nga magsugod sa Barangay Patpat padulong sa sentro sa syudad.
Gibutyag ni Sagocsoc, nga ang inisyal nga produksyon sa tubig anaa sa 5,000 cubic meters, nga igo na aron makasuplay sa kapin 7,000 ka kabalayan.
Dugang pa, giklaro niini nga dili tumong sa proyekto nga hulipan ang PrimeWater sa tibuok syudad, apan mutabang sa pagsuplay sa limpyo ug igo nga tubig hilabina sa mga barangay nga wala pa maabot o kulang ang serbisyo sa panubig.