Gipangunahan karon sa kapulisan ug kabomberohan ang imbestigasyon sa usa ka gituohang tinuyo nga sunog nga nakaangin og dagkong kadaot sa Purok 7, Barangay Bagontaas, Valencia City, Bukidnon. Nadamay ang pito ka panimalay sa insidente nga nahitabo niadtong milabay nga adlaw alas 3 sa hapon, ug gituohang usa ka lalaki ang nagpasugod sa kalayo.
Gipasabot sa inisyal nga imbestigasyon nga ang kalayo mitungha gikan sa usa ka panimalay ug midilaab padulong sa lima pa ka balay sa kasikbit niini. Sumala ni FO1 Ryan Calle, fire arson investigator sa Valencia City Fire Station, ang testimonya sa mga residente nagpunting nga gituyo sa maong lalaki ang pagsunog, apan padayon pa kining ginasuta sa otoridad.
Gitumbok usab sa usa ka residente, nga si Carroline Edano, nga ang sunog nagsugod sa panimalay ni Dexter Villas ug midamay sa balay nila Eddie Barducilio, Omar Madriaga, Rodrigo Cababan, Punchieta Cababan, samtang partially damaged ang mga panimalay nila Ammie Augustin ug Edgar Puntuyan.
Gibutyag usab ni Jun Galario, consultant ug kanhi mayor sa Valencia City, nga ang suspek dugay nang problema sa komunidad ug giingong nalambigit sa iligal nga droga.
Gibanabána sa bombero nga mokabat sa ₱4 milyones ang kadaot sa pito ka balay nga natupok sa maong sunog.