Gipasabot sa Commission on Elections (COMELEC) nga magapadayon ang pagpangandam alang sa umaabot nga voters’ registration bisan pa sa posibleng pagkansela o paglungtad sa termino sa mga kasamtangang barangay ug SK officials karong tuiga.
Sa pakighinabi sa Bombo Radyo Malaybalay, gibutyag ni Atty. Danilo Dividina, Election Officer sa Malaybalay City, nga dili sa COMELEC kundili sa Kongreso ang katungod sa pagdesisyon kung madayun ba o dili ang eleksyon.
Dugang pa niini, pagahulaton pa ang pirma sa Presidente aron mahimong pinal ang paglungtad sa termino ug ang posibleng pag-postpone sa eleksyon.
Sa kasamtangan, magpadayon ang buhatan sa COMELEC sa rehistro sa mga botante sugod karung adlawa ning tuiga (Agosto 1), ingon man ang uban pang kalihokan nga may kalabutan sa eleksyon.
Gilauman sa ahensya nga kung ma-kansela man ang maong eleksyon, makatabang kini sa mas lapad nga preparasyon sa tibuok nasud alang sa luwas ug hapsay nga eleksyon.