Gitambungan sa gatusan ka katawhan sa Bukidnon ang nagdilaab nga panawagan batok sa nagpadayon nga isyu sa milyon- milyong korapsyon, diin gisyagit ang panawagan nga tapuson ang pag-abuso sa kwarta sa katawhan.
Nagtapok ang mga partisipante kagahapong adlawa sa San Isidro Cathedral sa Malaybalay City aron mosalmot sa Trillion Peso March—usa ka unity Mass ug rally nga nagtumong sa pagpangayo og accountability sa gitumbok nga flood control scandal nga naglakip sa contractors, opisyal sa DPWH, politiko ug uban pang giingong nakigkunsabo.
Nagsul-ob sa puti ang kasagaran sa mga mitambong samtang nagkupot og mga tarpaulin nga misaway sa “nagkagrabe nga kultura sa korapsyon.” Sa pakighinabi sa Bombo Radyo Malaybalay, kay Archbishop Noel P. Pedregosa sa Diocese of Malaybalay nga ang lihok dili pagpanghilabot sa politika, apan tin-aw nga panawagan aron manubag ang angay manubag.
Nag-awhag siya sa “pagbuhat sa kaangayan” ug mipadayag sa responsibilidad sa Simbahan nga mubarug kontra sa mga “nangawat ug nangurakot sa kwarta sa katawhan.”
Dugang pa ni Pedregosa, tumong usab sa maong lakang ang pagpadagan og signature campaign isip usa ka proactive nga tubag nga ipasa sa upat ka congressman, lakip na ang pagmugna og grupo sa nagkalain-laing sektor aron makigbatok sa korapsyon.
Ang Diocese of Malaybalay usa sa 86 ka dioceses nga nagdungan sa pagpakita og suporta sa nag-unang protesta sa EDSA People Power Monument.
Mitambong usab sa maong panawagan si Malaybalay City Mayor Atty. Jay Warren Pabillaran ug nagkanayon nga lehitimong “exercise of democracy” ang pagpakita sa sentimyento sa katawhan.
Sumala usab ni PLtCol. Joepet B. Paglinawan sa Malaybalay Police Station, nagpabiling nga malinawon ang protesta ug wala’y natala nga kalapasan, apan nagpabilin gihapon sa heightened alert sa kapulisan.