Padayon nga giagwanta sa mga residente ang baho sa hugaw sa baboy sa Barangay Patpat, ning syudad, diin nadugangan pa kini sa daghang mga langaw.
Sa ekslusibong pakighinabi sa Bombo Radyo Malaybalay kang Sanny Palomar, Purok President, Purok 4, Barangay Patpat, Malaybalay City, gibutyag niini nga usa sa mga gitutokan nga hinungdan ang Farmcrest Ventures Inc. nga anaa sa Barangay Patpat.
Dugang pa sa Purok President, nga ang barangay miaksyon na ug gipasa kini ngadto sa Department of Environment and Natural Resources kon DENR ug nagpahigayon na og inspection sa ikatulo nga higayon.
Gikumpirma ni Palomar, nga nasapon mismo nila nga gibuhian sa Farmcrest ang hugaw sa baboy gikan sa manure lagoon ngadto sa sapa hinungdan sa baho nga palibot sa barangay.
Sigon ni Palomar, gihulatan pa ang resulta sa imbestigasyon ug inspeksyon nga gibuhat sa DENR.
Samtang, kabahin sa daghan nga mga langaw, gikaingong gikan kini sa mga nagpalibot nga poultry sa barangay.
Apan kasamtangang gisuta kung unsa ang mga lakang nga himuon aron nga masulbad ang maong problema.