Nakaplagang wala nay kinabuhi ang usa ka 21 anyos nga estudyante sulod sa iyang girentahang boarding house sa Purok 7, Barangay 1, ning dakbayan sa Malaybalay.
Base sa inisyal nga imbestigasyon sa Malaybalay City Police Station gikaingon nga nag-inom ug insecticide ang biktima samtang naa sulod sa iyang lawak ug gituohan nga nahitabo ang pagkutlo sa kinabuhi pasado alas 4:40 sa hapon.
Unang nakadiskubre sa insidente ang uyab sa biktima nga dihang misulod sa lawak nakit-an niini nga wala nay kinabuhi.
Matod pa sa kapulisan, adunay personal nga problema sa pag eskwela ug relasyon ang biktima nga posibleng nakatuklod sa iyang desisyon.
Gipahayag usab nga dili kini ang unang higayon nga misulay ang biktima sa pagkutlo sa kinabuhi human kini misulay paghiwa sa iyang kamot niadtong Agosto ning tuig. Samtang, walay nakitang foul play sa lugar sa insidente base sa gihimong imbestigasyon sa kapulisan.
Ang biktima usa ka third year student nga nagtuon sa usa sa mga kolehiyo sa syudad ug nagkuha sa kursong Bachelor of Science in Business Administration. Nasayran usab nga kini lumad nga taga Barangay Lantay, Pangantucan, Bukidnon.