Wala gidawat sa House of Representatives ang ika-duha ug ika-tulo nga verified impeachment complaints batok kang Presidente Ferdinand Marcos Jr., human madawat na ang unang reklamo ni Atty. Andre de Jesus niadtong Enero 19, 2026, nga gipaluyohan ni Rep. Jernie Jett Nisay sa Pusong Pinoy Party-list.
Sumala sa pamalaod sa House, kon adunay usa ka reklamo nga “properly filed,” dili na modawat og dugang reklamo batok sa samang opisyal hangtod mahuman ang proseso sa una. Matod ni House Secretary General Cheloy Garafil, ang unang reklamo na-forward na sa buhatan ni Speaker Faustino “Bojie” Dy III ug sulod sa 10 ka sesyon ilakip kini sa Order of Business sa dili pa ipadala sa Committee on Justice.
Ang mga alegasyon naglakip sa giingong pagtugot sa ICC arrest kang kanhi Presidente Rodrigo Duterte, isyu sa flood control projects, ug giingong paggamit og gidiling droga. Apan, daghang magbabalaod ang nag-ingon nga huyang ang reklamo ug lagmit dili molampos tungod sa kakuwang sa lig-on nga ebidensya.