Gimando sa Department of Public Works and Highways (DPWH) ang pagpangita sa labing paspas ug epektibong solusyon sa dako nga landslide nga natigayon sa Bukidnon–Davao City Road sa Sitio Kipolot, Barangay Palacapao, Quezon, Bukidnon, human sa personal nga inspeksyon ni DPWH Secretary Vinze Dizon, kagahapong adlawa.
Gimandoan sa kalihim ang mga teknikal nga eksperto sa DPWH susihon ug tun-an gilayon ang kahimtang sa lugar uban sa mga geologist ug sa Department of Environment and Natural Resources (DENR) aron masabtan ang hinungdan sa pagdahili sa yuta ug mapangitaan kini og permanenteng solusyon, ilabi na nga kini nga dalan naghimo og koneksyon tali sa Northern Mindanao ug Davao Region.
Gibutyag sa DPWH Region 10 nga magtukod og alternatibong dalan aron mapasig-uli ang trapiko samtang nagahimo pa og teknikal nga pagtuon ug plano alang sa rehabilitasyon sa maong karsada. Gipasalig usab sa kalihim nga madali ang pagpagawas sa pondo aron masugdan dayon ang pag-ayo sa lugar.
Samtang, gipahibalo sa Incident Command System (ICS) nga gihunong temporaryo ang search and retrieval operations alang sa magtiayon nga gikaingong nahilakip sa landslide tungod sa padayon nga pag-ulan ug peligro sa mga rescuers. Sumala ni Forts Cabarde, Public Information Officer sa LGU Quezon, padayon ang agas sa tubig ug nagadahili ang yuta nga nakababag sa operasyon bisan pa sa pag-deploy sa duha ka K9 units nga nakadetect og baho sa usa ka posibleng dapit diin ang mga missing posibleng nahimutang.
Gilauman nga magsugod karong adlawa ang paggamit sa backhoe human makompleto ang temporary access road padulong sa ubos nga bahin sa landslide site, aron mapadali ang operasyon ug rehabilitasyon sa lugar nga importante nga agianan sa duha ka rehiyon sa Mindanao.