Giklaro sa Department of Health – Center for Health Development for Northern Mindanao (DOH-CHD NM) ug sa Provincial DOH Office sa Bukidnon nga wala silay ipagula nga lockdown notice tungod sa balita-balitang monkeypox o mpox.
Gipasiugda sa duha ka buhatan nga hangtod karon, ang tibuok rehiyon sa Northern Mindanao (Region X), lakip na ang lalawigan sa Bukidnon, nagpabiling mpox free, o walay bisan usa ka kumpirmadong kaso sa maong sakit.
Ang Provincial Government of Bukidnon (PGB), pinaagi sa Provincial Health Board nga gipangulohan ni Dr. Jose Rhoel C. De Leon, Health Overseer sa Bukidnon, nagpahigayon og miting uban sa tanang miyembro ug stakeholders aron hisgutan ang mga isyu ug kabalaka kabahin sa Monkeypox.
Sa maong miting, usa ka tin-aw nga pahayag ang gipagula nga wala magpatuman ang PGB og lockdown tungod sa mpox, ug wala sab kini nagplano sa pagbuhat niini sa pagkakaron.
Gipahimangnoan sa mga otoridad ang publiko nga magmatngon sa pagpangayo og impormasyon gikan sa mga opisyal ug kasaligan nga tinubdan lamang ug dili magpakalat o mutuo dayon sa mga dili sigurado nga impormasyon nga gikuha sa social media o text. Ang Department of Health nagtambag sa katawhan nga magpabilin ang husto nga pagpraktis sa personal nga kahinlo, pag-obserba sa sintomas, ug pagkonsulta dayon sa health center kon adunay kasinatian nga kahimtang sa panit o mga simtoma nga susama sa Monkeypox.