Giplano sa defense team ni kanhi Pangulong Rodrigo Duterte nga usabon ang ilang pag-pasaka og laing mosyon alang sa pagpagawas sa kanhi Pangulo. Kini human gibasura sa International Criminal Court (ICC) Appeals Chamber pinaagi sa usa ka unanimous decision ang unang hangyo nga temporaryong pagpagawas sa kanhi Presidente niadtong Biyernes.
Sumala sa lead counsel ni Duterte nga si Nicholas Kaufman, karon ilang gihulat ang resulta sa medical evaluation sa kanhing Pangulo nga ipagawas karong Disyembre. Ang maong medical evaluation maoy mosusi sa physical ug cognitive condition sa kanhi Pangulo. Giingon usab ni Kaufman nga dili na katingalahan ang desisyon sa Appeals Chamber kay sukad pa, wala pay kaso nga giaprubahan sa ICC alang sa interim release sa usa ka indibidwal nga giakusahan og crimes against humanity.
Mipadayag usab ang depensa nga dili na angay nga itandi nga “flight risk” ang 80 anyos nga Duterte ug dili sab kini hulga sa mga testigo tungod sa iyang nagkaluya nga kahimsog. Matod pa ni Kaufman, ang resulta sa medical evaluation maoy mahimong pundasyon sa ilang bag-ong mosyon para sa interim release.
Gipunting usab sa depensa nga magpadayon sila sa ilang paningkamot aron makab-ot ang pagpagawas sa kanhi Pangulo bisan pa sa nagkadugang nga mga pagdumili sa ilang hangyo. S
amtang, sa kabahin sa mga pamilya sa mga biktima sa war on drugs, gipahayag ni Atty. Gilbert Andres, usa ka ICC-accredited lawyer, ang ilang kalipay sa maong desisyon. Matod niya, ilang gilauman ang maong resulta apan mas makalipay kini nga madungog mismo ang pagbasa sa desisyon, kay ilang tan-aw nga kini maoy sinugdanan sa pag-alsa sa hustisya ug katungod sa tawo nga dugay nang gilikayan sa mga biktima sa kampanya kontra droga.