Adunay gihimong intelligent monitoring sa Criminal Investigation and Detection Group (CIDG) Bukidnon batok sa dagkong illegal nga drugas sa lalawigan.
Sa eksklusibong pakighinabi sa Bombo Radyo kay LTC Ian Datiles, Provincial Officer sa CIDG Bukidnon nga gikinahanglan pa nga palig-onon ang impormasyon aron makahimo ug operasyon.
Lakip sa ilang prayoridad karong buwana mao ang pagtabang sa lokal nga kapulisan sa pagdakop sa mga wanted persons, ilabi na katong adunay seryosong kaso.Lakip usab sa prayoridad sa CIDG ang pagbatok sa nagkadaghan nga kaso sa illegal nga sigarilyo sa Bukidnon.
Saysay pa ni LTC Datiles nga kon adunay report nga ilang madawat kalabot sa pagpamaligya sa illegal nga segarilyo ila dayong kuhaan og dugang impormasyon, buhaton ang operational research ug sundan kini sa tukmang operasyon.
Dugang pa sa opisyal, padayon ang ilang panawagan sa publiko sa pagreport sa bisan unsang kalihukan aron mas mapalig-on ang kampanya batok krimen sa lalawigan.