Gibatikos ni Davao City 1st District Rep. Paolo Duterte ang Kamara human gibasura ang ikatulong impeachment complaint batok kang Presidente Ferdinand Marcos Jr., nga matod niya supak sa Saligang Batas ug insulto sa publiko.
Matud niya, dili makatarungan ang pagdumili tungod lang kay wala sa nasud ang Secretary General, kay mahimo man dawaton ang reklamo sa bisan kinsang awtorisadong empleyado. Iyang giingon nga ang aksyon sa Kamara usa ka tinuyo nga pagsulay sa pagpanalipod sa Presidente ug dili lang isyu sa proseso.
Gipahinumdoman usab ni Duterte nga ikaduha na kini nga higayon nga gibalibaran ang impeachment complaint, lakip ang susamang reklamo gikan sa Duterte Youth party-list sa miaging tuig, ug nagpasidaan nga makapahuyang kini sa pagsalig sa publiko sa Kamara.