Supak ang Commission on Elections kon COMELEC-Malaybalay batok sa panukiduki sa pagpaubos sa edad sa mga kandidato sa pagka-Presidente sa nasud.
Sa eksklusibong pakighinabi sa Bombo Radyo Malaybalay kang Atty. Danilo Dividina, Election Officer sa COMELEC-Malaybalay, miluwat nga klaro ang anaa sa Konstitusyon kabahin sa kwalipikasyon isip pagka-Presidente ug bise-presidente diin kinahanglan usa ka natural born citizen ug labing menos kuwarenta (40) anyos ang edad.
Matud pa ni Atty. Dividina, ang maong pagpaubos sa edad nagpakita lamang sa personal nga interes.
Gipasabot niini, nga dili angay ipaus-os ang sumbanan tungod gikinahanglan nga ang mosalmot sa pinakataas nga posisyon sa nasud adunay igong kahibalo, kasinatian ug hamtong sa pangedaron.
Gidugang pa niini, mahimong makadaot kini sa kalidad ug integridad sa atong pagpili og lider.
Gisugyot ni Dividina, mas angay tutokan ang pagpataas ug pagpalapad sa kwalipikasyon aron masiguro nga ang mga molingkod sa pagdumala sa nasud angay ug andam sa maong dakong katungdanan.