Mibati ug kahadlok ug kalisang ang katawhan sa lalawigan sa Bukidnon human nakasinati og magnitude 5.6 karong adlawa.
Sumala sa datos sa mga otoridad ug educational institutions, daghang mga magtutungha ang nakasinati og kakurat, panic, ug pagkuyapan atol sa linog nga nahitabo ning buntag, adlawng Byernes, Oktubre 10, 2025.
Sa pakighinabi sa Bombo Radyo Malaybalay kang Almaco Filemon A. Villanueva Jr., Administrative Officer sa Bukidnon National High School, gibutyag niini nga adunay walo (8) ka estudyante ang nasinati og shock, ug usa (1) ang naangol, apan minor injuries lamang ang nadawat ug wala kini nagkinahanglan og dako nga medikal nga pag-atiman.
Samtang sa Bukidnon State University (BukSU), sa pagpanubay sa Bombo Patrol kang Rhondell M. Paraiso, DRRMO Officer sa Bukidnon State University, matud pa niini nga sa inisyal nga natala nga adunay 50 ka indibidwal ang girespondehan sa mga emergency personnel.
Diin sa annex campus sa parehas nga unibersidad, adunay usab napulo ug usa (11) ka mga estudyante ang nakuyapan ug nakuyapan gumikan sa panic, ug kini dali nga giatiman sa mga personahe sa Malaybalay City Disaster Risk Reduction and Management Office.
Gipangunahan sa Bukidnon State University ang pagpatuman sa suspension sa klase human sa kusog nga linog.
Dayon nga nag-anunsyo ang unibersidad nga ang tanang lebel sa klase sa Main ug EduHub Campus mupaubos una sa asynchronous learning, aron mapanalipdan ang kaluwasan ug kaayohan sa tanang estudyante ug kawani samtang nagpadayon ang ilang pagtuon.
Gilauman nga mobalik ang face-to-face o regular nga klase sa Lunes, Oktubre 13, 2025. Gisundan usab kini nga anunsyo sa daghang mga lungsod ug syudad sa Bukidnon nga nagpatuman sa suspensiyon sa tanang lebel sa klase.
Lakip niini ang Malaybalay City, Valencia City, Kibawe, Dangcagan, Maramag, Manolo Fortich, Pangantucan, Don Carlos, Talakag, Kalilangan, Cabanglasan, Sumilao, Kitaotao, Impasug-ong, Libona, Malitbog, ug Damulog.
Matud sa mga otoridad, ang tanang apektado anaa na karon sa luwas nga kahimtang, ug padayon ang assessment sa mga estruktura ug pasilidad aron masuta ang posibleng kadaot.
Gipahimangnoan usab ang publiko nga magpabiling mag, magmatngon, ug mosunod sa mga giya sa lokal nga disaster response units, ilabina sa posibilidad sa mga aftershocks.
Padayon karon ang monitoring sa mga otoridad samtang gipanid-an ang mga aftershocks ug posibleng kadaut nga hinungdan sa linog.