Giila sa Philippine Sports Commission (PSC) ang Bukidnon Sports and Cultural Complex sa Malaybalay City, Bukidnon isip potensyal nga mahimong usa ka training hub sa national boxing team alang sa preparasyon sa internasyonal nga kompetisyon.
Miuyon si PSC Chairman Patrick “Pato” Gregorio, uban ni Senador Miguel Zubiri, ug Gobernador sa Bukidnon nga si Oneil Roque and Alkalde sa syudad sa Malaybalay nga si Atty. Jay Warren Pabillaran, ug ubang lokal nga opisyales sa Bukidnon ang paggamit sa pasilidad aron mahimong breeding ground alang sa mga Filipino world-class nga mga boksidor.
Ang 13-hectare nga complex adunay 15,000-seat stadium, track and field oval, football field, ug aquatics center nga kompleto sa Olympic-size swimming pool. Apil usab ang 3,000-seat gymnasium, tennis courts, auditorium ug museo.
Si Zubiri, nga nagpalikod sa mga landmark development sa Northern Mindanao, mipasalig sa Senate support sa regional training centers ug mapasigarbuhon ang Bukidnon nga mahimong host sa boxing team.
Gipasabot ni Gregorio nga tumong sa PSC nga magtukod ug regional training centers gawas sa Metro Manila uban ang suporta sa LGU ug national government.
Nagpadayag usab ug suporta si national boxing coach Elmer Pamisa, nga nakadiskubre sa Tokyo Olympics silver medalist nga si Carlo Paalam, diin miluwat kini nga dako ang potensyal sa Bukidnon alang sa boxing.
Samtang ang natad sa football sa Bukidnon naglaum sa artipisyal pitch kung maaprobahan ang posibleng pag-apply alang sa usa ka grant gikan sa International Football Federation kon FIFA.