Mosalmot sa Taiwan Coffee Roasting Competition sa unang semana sa Disyembre 2025 ang garbo sa Bukidnon nga si Bruce Bryan Rubio, nga mao usab ang Champion sa 2025 Philippine Coffee Roasting Competition, isip usa sa mga representante sa nasud Pilipinas.
Sa eksklusibong pakighinabi sa Bombo Radyo Malaybalay atol sa programang “Good Morning Philippines”, gibutyag ni Rubio nga mubyahe kini padulong Taiwan sa katapusan sa Nobyembre aron magbansay ug mag-andam alang sa internasyonal nga kompetisyon.
Matud pa ni Rubio, magsugod kini sa coffee roasting niadtong 2023 uban sa giya ug suporta sa amahan nga maoy unang mentor niini sa maong kahanas.
Taliwala nga marketing ug sales ang orihinal nga propesyon niini, nakakab-ot kini sa kalampusan pinaagi sa determinasyon ug wala’y puas nga pagpaningkamot.
Kahinumdoman nga bag-ohay lang nahimong kampyeon si Rubio diin misalmot kini sa 2025 Philippine Coffee Roasting Competition nga gipahigayon sa Sultan Kudarat Convention Center niadtong Oktubre 5–9, 2025, ug gipildi ang 14 ka top-tier roasters gikan sa lain-laing rehiyon sa nasud.