Pormal nga gilusad sa Bombo Radyo Philippines ang “Dugong Bombo: A Little Pain, A Life to Gain,” ang pinakadakong one-day bloodletting event sa nasud nga ipahigayon sa Nobyembre 15, 2025.
Ang aktibidad ipatuman dungan sa 25 ka lugar sa nasud pinaagi sa 32 ka AM ug FM stations sa Bombo Radyo, uban sa Philippine Red Cross.
Sa pakighinabi sa Bombo Radyo Malaybalay kang Jocelyn Daroy, Head Officer sa PRC-Bukidnon, nagpasabot kini nga importante ang padonar sa dugo gumikan taas ang panginahanglan sa dugo tungod sa vehicular accident, panganganak, dialysis ug uban pang sakit nga nagkinahanglan daghang suplay sa dugo matag bulan.
Giklaro niini nga libre ang dugo apan adunay processing fee alang sa mga recipient nga nanginahanglan og suplay sa dugo.
Samtang alang sa 16 -17 anyos nga donor, kinahanglan og parental consent.
Nanawagan ang Bombo Radyo ug Philippine Red Cross sa publiko, stakeholders ug lokal nga komunidad sa pag-apil sa maong kalihukan aron makatabang sa pagluwas og daghang kinabuhi. Aron makarehistro, kontaka ang pinakaduol nga sibyahan sa Bombo Radyo.