Mipasaka og reklamo ang Bureau of Internal Revenue (BIR) sa Department of Justice batok sa tulo ka kanhing engineers sa Department of Public Works and Highways (DPWH) nga sila si Henry Alcantara, Brice Hernandez, ug JP Mendoza tungod sa tax evasion.
Sumala sa BIR, base sa gihimong lifestyle check, nakit-an nga nagkinabuhi og hayahay ang maong mga opisyal nga dili tugbang sa ilang suweldo isip kawani sa gobyerno, lakip na sa ilang income tax returns ug statements of assets, liabilities, and net worth (SALN).
Gikan sa ilang mga transaksiyon pinansyal, kabtangan, ug interes sa negosyo gikan 2020 hangtod 2024, matud sa ahensiya nga wala sila makabayad og kapin P1.6 bilyon nga buhis.
Matod ni BIR Commissioner Romeo Lumagui Jr., nakapalit ang mga opisyal og mga luxury vehicle ug mga mahalong kabtangan nga labaw pa sa ilang gipahayag nga kita.
Dugang pa niini, nga adunay ebidensya nga nadawat sa tulo ang dagkong kantidad gikan sa mga kickback nga may kalabutan sa mga gitahod nga “ghost” flood-control projects, diin ang bahin sa maong pondo usab gigamit sa mga casino alang sa money laundering.
Ang BIR usab nangayo og mga kopya sa statements of contributions and expenditures gikan sa Commission on Elections (Comelec) aron masuta kung ang mga napiling opisyal nagbayad ba og husto nga buhis gikan sa ilang mga donasyon sa kampanya.