Nagpasaka og kaso ang OPM girl group nga BINI uban sa ilang abogado nga si Atty. Joji Alonso batok sa usa ka indibidwal nga giingong nakalapas sa Cybercrime Prevention Act ug sa kaso nga “unjust vexation” diin nga nagpasabot og bisan unsang binuhatan nga walay basihanan o legal nga rason apan nakasamok, nakapahasol, o nakahatag og mental o emosyonal nga kadaut bisan walay pisikal nga pasakit.
Ang reklamo gipasa niadtong Lunes, Agosto 18, 2025, sa Hall of Justice sa Sta. Rosa, Laguna.
Matud ni Atty. Alonso, dili kini kaso nga libel, kondili paglapas sa Article 287 sa Revised Penal Code nga may kalabotan sa Section 4(b) sa RA 10175 o Cybercrime Prevention Act of 2012.
Nagsugod ang isyu gikan sa usa ka video sa BINI samtang nagkaon og street food.
Ang orihinal nga 25 minutos nga video giputol ngadto sa duha (2) ka minutos nga puro negatibong reaksyon ang gipakita.
Tungod niini, nakahatag kini og sayop nga impresyon sa publiko.
Tungod sa maong video, nakasinati og grabe nga online bashing, hulga, ug personal nga pandaot ang mga miyembro sa BINI nga nakaapekto sa ilang mental ug emosyonal nga kahimtang.
Dugang pa ni Alonso, ang lakang nga gihimo sa BINI usa ka mensahe batok sa online bullying ug paninira, ug panahon na aron hunongon ang ingon ani nga klase sa abuso online.
Kung mapamatud-an ang respondent, posible kini mapriso sulod sa unom hangtod dose ka tuig.
Nangayo usab ang kampo sa BINI og danyos nga P1 milyon alang sa matag miyembro sa grupo.