Gisaway karon sa sektor sa mamumuo ang bag-ong wage increase, tungod layo ra kini sa gikinahanglan sa daily living wage.
Sa eksklusibong pakighinabi sa Bombo Radyo Malaybalay kang Ray Talimio Jr., kanhi miyembro sa Economic Development Committee sa Regional Development Council–Region 10, miluwat kini nga bisan pa man og positibo ang pagpatuman sa wage increase nga epektibo Enero 16 nga adunay dugang P25, nga sundan pa sa ikaduhang tranche nga P14 sa Hulyo 1, diin sa kinatibuk-an adunay P39 nga usbaw sa suholan, dili matud pa kini igo kung itandi sa tinuod nga gasto sa panginabuhian sa matag adlaw.
Apan gipasabot usab sa ekonomista ngalabing maayo na kini kontra sa wala, hilabi na tungod sa panginahanglan sa epekto sa inflation, nga sa kasamtangan miabot sa 1.7 porsyento ug aduna na kini dakong impluwensya sa palit sa mga batakang panginahanglan.
Samtang niini, gihulatan usab sa lain-laing sektor ang posibleng lakang sa lehislatura kabahin sa dugang wage increase, nga sumala sa mga eksperto, posibleng makahatag usab og dugang kabalaka sa sektor sa negosyo, hilabi na sa gagmay nga mga negosyo nga mag-atubang sa dugang gasto sa operasyon.