Nagplano ang Gaza Humanitarian Foundation (GHF), usa ka grupo nga suportado sa Estados Unidos, sa pag-apod-apod og pagkaon ug tabang sa Gaza pinaagi sa mga kontroladong hub nga pagabantayan sa mga pribadong kontraktor.
Apan, gisaway kini sa United Nations ug uban pang mga humanitarian organizations nga nagpasidaan nga ang maong plano posibleng magdala sa militarisasyon sa humanitarian aid ug mahimong magpugos sa mga Palestino nga mobalhin gikan sa ilang mga lugar.
Giinsistir sa UN nga andam na ang ilang plano alang sa pag-apod-apod og tabang ug nanawagan sa Israel nga tangtangon ang blockade sa Gaza aron matugotan ang magpadayon ug hapsay nga delivery sa ayuda.
Nagpabiling kritikal ang kahimtang sa Gaza, uban sa kakulang sa pagkaon, tubig ug tambal. Nangayo og kooperasyon ang mga humanitarian groups gikan sa internasyonal nga komunidad aron masiguro ang neutral ug patas nga paghatod sa tabang ngadto sa mga sibilyan nga apektado sa krisis.