Gisurrender ni Atong Ang iyang lima ka armas human gibawi sa Philippine National Police (PNP) ang iyang firearms licenses, sumala sa iyang abogado ug sa pulisya.
Sa sulat ngadto kang PNP-Firearms and Explosives Office (FEO) acting chief Jose Manalad Jr., giingon ni Atty. Gabriel Villareal nga na-turn over na ang mga pusil niadtong Enero 20 sa Mandaluyong City Police Station, human gibawi ang lisensya ni Ang samtang nag-atubang siya sa arrest warrant kalabot sa kaso sa mga nangawala nga sabungero.
Lakip sa iyang gisumite nga armas ang: 5.56 caliber Colt rifle, Glock 9mm pistol, 9mm Sig Sauer pistol, .38 Smith & Wesson revolver, ug Battle Arms Development 9mm pistol.
Usa pa ka rehistradong .260 BAD rifle ang na-report nga nawala niadtong Oktubre 2025.
Gikumpirma ni Manalad nga misunod si Ang sa kamanduan sulod sa gihatag nga panahon ug ang mga pusil karon naka-safekeeping na sa PNP.
Tungod niini, wala na siya giila isip nga “armed and dangerous” base sa daang klasipikasyon sa pulisya. Nagpadayon gihapon ang manhunt operations aron dakpon ang negosyante.