Nadiskubre ni Senate President Pro Tempore Panfilo “Ping” M. Lacson niadtong Martes ang pulong nga “allocable” sa mga dokumento sa 2025 national budget nga giisip niya nga bag-ong porma sa pork barrel nga gihulagaway niini nga “corrupt to the core.”
Matod ni Lacson, ang mga “allocables” anaa sa National Expenditure Program (NEP) ug naghatag og kahigayonan nga mapondohan ang mga proyekto bisan wala pa kini mailhi o matino.
Sa una nga assessment ni Lacson ug sa iyang staff, nakadawat ang House leadership og P143.5 bilyon nga allocables.
Apil usab ang mga party-list, ug giingon usab niyang adunay mga “non-legislators” nga nakadawat niini — lakip na ang usa ka opisyal sa executive department nga nakakuha og P8.3 bilyon.
Gipasabot usab ni Lacson, nga si kanhing DPWH Secretary Manuel Bonoan nakadawat usab og allocables sa 2025 budget.
Sa pangutana nga DPWH ra ba ang nakadawat, iyang klaro nga adunay ubang mga ahensya gawas sa DPWH ang nakakuha niini.
Nagpabilin siyang kompyansa nga dili na maapil sa 2026 budget ang mga “allocables” ug nga mahimong “the most transparent national budget,” lakip na ang pagtangtang sa unprogrammed appropriations gawas sa foreign-assisted projects.
Sa katapusan, iyang panawagan sa publiko nga magpabilin nga masuko batok sa korapsyon sa likod sa mga questionable flood control projects, apan ubanan kini og pasensya samtang moagi sa hustong proseso nga mosangpot sa prosecution, conviction, ug pagkabilanggo sa mga responsable.
Gipadayag usab niini nga nakigpulong siya kang Ombudsman Jesus Crispin Remulla, Justice Secretary Fredderick Vida, ug Prosecutor General Richard Fadullon, ug iyang nakita ang ilang tinud-anay nga pagpanglakaton aron padayonon ang proseso hangtod sa katapusan.