Gipasiugdahan ang kontrobersiya human sa pamahayag ni Senadora Imee Marcos nga nag-akusar sa iyang igsoong si Presidente Ferdinand Marcos Jr. sa paggamit og illegal nga droga. Sa eksklusibong pakighinabi sa Bombo Radyo Malaybalay, mipadayag si Jun Galario, kanhing mayor ug tigpamaba sa Valencia City, nga mahimong makabangil ang maong isyu sa dagan sa nasud ilabina kay gikan mismo sa sulod sa pamilya ang alegasyon.
Matud pa ni Galario, dili malikayan nga hatagan kini og bug-at nga isyu sa publiko tungod kay igsuon mismo sa Presidente ang nagpagula sa pamahayag, nga posibleng nagpasabot og elemento sa kamatuoran. Iyang gibutyag nga dili sayon ang proseso sa pagpahawa sa Presidente kay nagkinahanglan kini og lig-on nga legal nga pamagi ug suporta gikan sa katawhan.
Sa lain nga pakighinabi sa Bombo Radyo Malaybalay, mipadayag si Ray Talimio Jr., kanhing Oro Chamber chairman ug former Economic Development Committee chair sa RDC-10, nga ang alegasyon seryoso ug makapahuyang sa pagsalig sa mga lokal ug internasyonal nga mamumuhunan.
Matud pa niini, bisan unsang anomaliya sa liderato makapugong sa kapital ug negosyong mosulod sa Pilipinas. Gipasabot sa duha ka ekonomista nga ang kasamok mahimong mosangput sa pag-ubos sa interes sa foreign investors tungod kay dili gustong mopuhunan ang negosyo sa usa ka nasud nga ang lider gidasmagan og isyu sa illegal nga binuhatan.
Samtang nagpaabot ang publiko og klarong tubag gikan sa Malacañang, gisugyot ni Galario nga ang Presidente angay mopailawom sa hair follicle test aron mapasiguro sa nasud nga walay basihanan ang akusasyon.