Gisuspende ang klase karong adlaw nga Lunes, Oktubre 26, sa Bukidnon National High School (BNHS) Senior High School Campus sa Purok 6, Barangay Casisang, Malaybalay City, human makadawat og hulga ang usa ka magtutudlo pinaagi sa social media post kagahapong adlawa. Lakip usab sa gisuspenso ang klase sa Casisang Integrated Elementary School subay sa maong insidente.
Sa pakighinabi sa Bombo Radyo Malaybalay kang Kevin Plasos, Assistant Principal sa Casisang Integrated Elementary School nga gipatuman ang pagsuspende sa klase aron mapanalipdan ang seguridad sa mga magtutungha ilabi ang mismong magtutudlo nga target sa pagpapanghulga.
Nunot niini, hugot ang pagpatuman sa imbestigasyon sa pagsubay sa identidad luyo sa maong post ug gani gipaningkamutan sa mga otoridad ang pagsuta taliwala sa hagit nga giatubang sa pag-ila sa suspek sa pagpanghulga.
Bisan pa sa pagsuspende sa klase, nagpadayon ang pagbantay sa mga sakop sa Barangay Public Safety Office (BPSO), ubos sa pagpangulo ni Barangay Kapitan Gregorio “Digs” Jaroy,ug gipasalig nga walay angay kabalak-an gumikan anaa ang mga personahe sa kapulisan ug kawani sa barangay sa pakigtimbayayong aron malikayan ang bisan unsang matang sa peligro.
Sa pikas bahin gipasabot ni Dr. Cherry Mae Limbaco Reyes, Schools Division Superintendent ning dakbayan nga gibalhin ang physical nga learning set-up ngadto sa offline class o modular aron magpadayon ang pagtuon sa mga estudyante samtang gipaniguro ang ilang kaluwasan.
Gani gisigundahan pa ni Police Colonel Pontillas nga adunay nay mga prospects sa pagpanghulga apan naglisod pa ang kapulisan sa pag-identify niini apan gipasalig sa masulbad ang isyu sa maong pagpanghulga.