Dili moubos sa 22 ka tawo ang namatay samtang 24 ang naangol human magbangga ang usa ka bus ug cargo truck sa usa ka highway sa Makueni County, Kenya, niadtong Domingo, Oktubre 25.
Base sa imbestigasyon sa lokal nga kapolisan, gikan sa usa ka lubong ang mga pasahero sa bus sa dihang nahitabo ang aksidente.
Sumala kang Makueni County Commissioner Abdullahi Khalif, nagpaayo na ang mga naangol, apan posibleng mosaka pa ang ihap sa mga namatay.
Wala pa matino ang hinungdan sa aksidente, apan gikonsiderar sa kapolisan ang posibleng paspas nga dagan sa sakyanan ug dili maayong kahimtang sa kadalanan.
Ang maong haywey nagsumpay sa siyudad sa Mombasa ug sa kapital nga Nairobi. Tulo ka semana sa wala pa ang maong insidente, 17 usab ka tawo ang namatay sa laing bangga sa maong dalan, nga giila sa mga otoridad nga usa sa mga lugar nga kanunayng mahitaboan og aksidente.