Plano sa Department of Agriculture (DA) nga ipailawom sa Public-Private Partnership (PPP) ang P80 bilyong proyekto sa farm-to-market roads aron mapadali ang pagtukod sa mga dalan sa mga kabaryohan sa tibuok nasud.
Sumala ni Agriculture Secretary Francisco Tiu Laurel Jr., nakigtambayayong ang DA sa World Bank ug International Finance Corporation aron mapalambo ang sistema sa PPP, diin ang pribadong sektor maoy motubag sa pondo ug bayran kini sa gobyerno sulod sa gitakdang panahon.
Matud sa kalihim, prayoridad ang mga lugar nga daghan og produkto sa agrikultura apan kulang sa dalan aron madala ang mga abot sa merkado, ilabina sa mga kabus nga komunidad.
Gawas sa planong PPP, adunay P33 bilyong pondo ang DA sa 2026 alang sa farm-to-market roads, lakip ang pagtukod sa 2,300 ka kilometros nga mga dalan pinaagi sa 1,605 ka proyekto.
Samtang, P16 bilyon ang gigahin alang sa farm-to-market roads sa 2027, apan matod ni Tiu Laurel, dili kini igo aron makab-ot ang tumong nga makatukod og 55,000 ka kilometros nga mga dalan.