Padayon ang pagpangita sa mga otoridad sa pito ka tawo nga gikataho nga nawala human miungbo ang usa ka building nga gipaandar pa ang konstruksyon sa Nairobi, kapital sa Kenya, niadtong Oktubre 23.
Ang maong building gibanabanang may 16 hangtod 18 ka andana ug nahimutang sa Eastleigh, usa ka abalang komersiyal nga lugar.
Matud ni Interior Minister Kipchumba Murkomen, 66 sa 67 ka trabahante sa konstruksyon ang nakalingkawas nga wala masamari samtang usa ang nasamdan.
Aduna usab 11 ka tindahan sa ubos ug basement sa building nga giingong nag-operate sa dihang nahitabo ang insidente, hinungdan nga gikabalak-an ang kahimtang sa mga tawo nga posibleng natanggong sa mga nagun-ob nga materyales.
Nagpadayon ang operasyon sa pagpangita ug pagluwas, samtang giimbestigahan sa mga otoridad ang hinungdan sa pagguho ug kung mituman ba ang building sa mga sumbanan sa kaluwasan.
Gikuwestiyon usab ang pagtuman sa mga regulasyon sa konstruksyon human gipahibalo sa gobernador sa Nairobi nga wala kini’y gikinahanglang sertipiko aron puy-an.