Nakadawat og hulga sa pagpamusil ang usa ka magtutudlo sa Senior High School sa Barangay Casisang, Malaybalay City, Bukidnon, nga giingong ipatuman sa wala mailhing indibidwal ugmang Lunes, Oktubre 26, 2026.
Base sa impormasyon, gipadala ang pagpanghulga pinaagi sa usa ka group chat gamit ang wala pa mailhing account, diin giingong magpamusil kini sa tunghaan sa alas 9:00 sa buntag.
Nagpadala usab ang maong indibidwal og video nga nagpakita sa giingong mga armas nga iyang giandam.
Matod ni Casisang Punong Barangay Gregorio “Digs” Jaroy, ilang pahugtan ang seguridad sa eskwelahan aron masiguro ang kaluwasan sa mga estudyante ug magtutudlo.
Samtang, wala pay kumpirmasyon kon adunay ipatuman nga suspensiyon sa klase tungod sa maong hulga.
Napa-blotter na sa kapulisan ang insidente ug padayon ang imbestigasyon aron mailhan ang responsable sa pagpanghulga.