Gitigbas ang usa ka lalaki human giingong nasakpan nga natulog uban sa kapikas sa 61-anyos nga suspek sa Purok 2, Barangay San Isidro, Valencia City, Bukidnon, niadtong Oktubre 24, 2026.
Giila ang biktima nga si alyas “Bolbolon,” residente sa Barangay Dagat-Kidavao, samtang ang suspek usa ka 61-anyos nga lalaki.
Sumala sa inisyal nga imbestigasyon sa kapulisan, nag-inom og makahubog nga ilimnon ang biktima, suspek ug duha pa ka indibidwal sa balay sa suspek sa wala pa nahitabo ang insidente.
Human sa ilang pag-inom, miadto ang suspek ug si alyas “Tony” sa lamay sa ilang silingan, apan sa pagpauli niini, nasakpan niya ang biktima nga natulog uban sa iyang live-in partner.
Tungod sa pangabugho, giingong mikuha og armas nga adunay duha ka hait nga sulab ang suspek ug gitigbas ang tuo nga tiil sa biktima.
Gidala ang biktima sa Malaybalay Provincial Hospital aron matambalan, samtang ang suspek giturn-over sa Valencia City Police Station alang sa tukmang disposisyon ug posibleng kasong ipasaka batok kaniya.