Gikumpirma nga pito ka tawo ang natalang namatay gumikan sa pagbagunos sa bagyong Opong sa Eastern Visayas, lakip na ang usa ka upat ka tuig nga bata nga taga-Biliran.
Daghang mga panimalay ang nadaot, ug pipila ka bahin sa Leyte, Baybay City, Almeria, Biliran, ug Samar ang nakaeksperyensya og landslide.
Nasinati usab ang pagbaha ang Ormoc City, Mahaplag, San Francisco, Southern Leyte, Catbalogan City, ug ubang lugar sa Samar.
Sumala sa Office of the Civil Defence Region 8, pito ka indibidwal ang naluwas sa Homonhon Island samtang ang mga gi-report kaniadto nga nawagtang ang luwas na nga nakabalik.
Mikabat sa 27,653 ka tawo ang apektado sa bagyo ug habagat, matud pa sa DSWD, padayon gihapon ang pag-apod-apod osa mga ayuda.
Padayon usab ang gihimong search and rescue operations sa OCD ug sa ubang mga ahensya sa gobyerno. Samtang lauman usab nga mosulod pa ang mga bagyo sa Philippine Area of Responsibility (PAR) karong ‘ber’ months, diin siyam (9) pa ka bagyo ang ginabantayan nga posibleng mosulod sa nasud sa wala pa matapos ang tuig.
Kini nag-uban sa La Niña Alert nga gi-anunsyo sa state weather bureau, nga nagpasabot og 70% o labaw pa nga posibilidad nga mamugos ang La Niña gikan Oktubre hangtod Disyembre ug posibleng magpadayon hangtod Pebrero 2026.
Matud pa sa Deputy Administrator nga si Marcelino Villafuerte, ang ika-16 nga bagyo paganganlan kini og “Paolo,” ug posibleng mosunod pa ang 5 hangtod 9 ka bagyo sa dili pa matapos ang tuig.
Gipaandam usab ni Villafuerte ang publiko, ilabi na sa Visayas ug Mindanao, nga kanunayng magbantay ug mag-andam gumikan kini kasagaran nga mga lugar nga unang makatagamtaman sa mga umaabot nga bagyo.
Bisan pa man nga dili gilauman nga mas kusog pa ang mga mosunod nga bagyo kumpara sa mga nangagi, gikinahanglan gihapon ang husto nga preparasyon aron malikayan ang dakong kadaot nga dala sa maong bagyo.