Nasikop sa mga otoridad sa managlahing buy-bust operations ang lima ka lalaki ug nakonpiska ang kapin P216,000 nga balor sa gituohang shabu sa nagkalain-laing lungsod ug siyudad dinhi sa atong lalawigan.
Ang mga operasyon gilusad sa San Fernando, Pangantucan, Kibawe, Valencia City ug Kalilangan inabagan sa mga Municipal ug City Police Stations lakip ang ubang special police units saBukidnon ug Region 10.
Sa San Fernando, nadakpan ang usa ka 31 anyos nga lalaki nga nakuhaan og 0.7 gramos nga shabu nga may Standard Drug Price nga P3,604.17.
Sa Pangantucan, usa ka 29 anyos nga lalaki ang nakuhaan og 8.15 gramos nga shabu nga mibalor og P55,420.00.
Samtang sa Kibawe ug Valencia City, nadakpan ang duha ka illegal drug personalities nga nakuhaan og 1.0 gram ug 10.3 gramos nga shabu nga may kinatibuk-ang SDP nga kapin P76,800.00.
Sa Kalilangan, nadakpan ang usa ka high value individual alias “Landy,” 45 anyos, nga nakuhaan og 12 gramos nga shabu nga may balor nga P81,600.00.
Lakip sa mga nakumpiskar nga ebidensya ang mga sachet sa gituohang shabu, salapi, cellular phones, motorsiklo ug personal nga mga butang.
Giandam na karon ang mga kaso batok sa mga suspek alang sa paglapas sa Sections 5 ug 11, Article II sa RA 9165 o Comprehensive Dangerous Drugs Act of 2002.
Ang tanan nga nadakpan anaa na sa kustodiya sa tagsa-tagsa ka police stations samtang ang mga iligal nga droga gidala sa Regional Forensic Unit alang sa eksaminasyon.