Tulo ang patay ug 45 ang samaran human usa ka drone strike ang mitama sa Kupol Electromechanical Plant sa syudad sa Izhevsk, Russia. Ang maong pabrika giila nga naghimo ug mga surface-to-air missile systems ug radar stations.
Gipasanginlan sa Russia ang Ukraine sa maong pag-atake gamit ang long-range drones. Kini na ang ikaduhang higayon nga gitarget ang nasangpit nga pabrika, sukad pa niadtong Nobyembre sa miaging tuig.
Tungod sa insidente, gideklara ang state of emergency sa rehiyon aron matubag dayon ang sitwasyon ug mahatagan ug medical assistance ang mga biktima.Samtang nagpadayon usab ang mga drone ug missile attacks nga gilusad sa Russia batok sa lain-laing bahin sa Ukraine, nga nagpadayon sa tensyon tali sa duha ka nasod sa kasamtangang giyera.