Giluwas sa mga otoridad ang 17 ka mga senior citizens ug Persons with Disabilities (PWDs) gikan sa usa ka walay lisensiya ug rehistradong care facility sa Maramag, Bukidnon, human masuta nga nagpadagan kini nga walay legal nga papeles ug naghatag peligro sa kahimtang sa mga residente.
Sumala sa Department of Social Welfare and Development (DSWD), nakigtambayayong ang ilang buhatan sa lokal nga kagamhanan ug kapulisan aron masiguro ang kaluwasan sa mga biktima. Nasuta sa imbestigasyon nga ang pasilidad nga giila nga Bukidnon Multi-Sectoral Services Foundation, Inc. (BUMSSEFI), adunay hugaw nga palibot, pi-ot nga tulganan, ug kakulang sa mga propesyonal nga magtatambal sa mga pasyente.
Matud pa sa DSWD, kaniadtong Pebrero ug Abril pa sila naghatag og tabang ug pahimangno sa maong organisasyon aron makumpleto ang ilang rehistrasyon, apan padayon gihapon kini nga nag-operate ug nagdawat og bag-ong kliyente. Tungod niini, gipatuman na sa DSWD ang suspension order ug gihatagan ang grupo og 30 ka adlaw aron motuman sa rekisitos.
Karon, ang mga nailuwas nga senior citizens ug PWDs anaa na sa mga pasilidad nga gipadagan sa DSWD ug lokal nga gobyerno. Nagpahinumdom ang ahensya nga ang tinuod nga pag-atiman dili lang makita sa buhat, kondili sa pagpanalipod ug pagtahod sa dignidad sa matag kinabuhi.