16 patay sa sunog sa Pabrika sa tela sa Bangladesh

Mukabat na sa 16 ka tawo ang namatay human masunog ang usa ka pabrika sa tela sa Mirpur, Dhaka, Bangladesh.

Gipahibalo sa mga otoridad nga lisod mailhan ang mga lawas sa mga biktima tungod sa pagkasunog ug ipailawom kini sa DNA testing aron matino ang ilang identidad.

Nagkatigom ang mga pamilya ug paryente sa mga biktima sa atubangan sa upat ka andanang building nga naabo sa sunog.

Matud pa sa mga bombero, milungtad og kapin tulo ka oras ang ilang pakigbisog sa kalayo nga mikalat pa ngadto sa silingang bodega sa mga kemikal.

Padayon ang imbestigasyon sa mga otoridad aron masuta ang hinungdan sa maong sunog.