Nasikop sa Riyadh, Saudi Arabia ang lima ka lalaking Pilipino human masakpan nga misulod sa usa ka panimalay aron mangawat. Apan wa sila maswerte kay nadakpan kini mismo sa tag-iya sa maong balay.
Sa imbestigasyon sa kapulisan, nakuhaan pa ang lima og iligal nga droga nga shabu, hinungdan nga posibleng atubangon nila ang silot kamatayon subay sa balaod sa Saudi Arabia.
Sa eksklusibong pakighinabi sa Bombo Radyo Malaybalay atol sa programang Zona Libre, gipahayag ni Atty. Proculo Sarmen nga kinahanglan sundon ang pamalaod sa nasud nga Saudi Arabia, tungod kay anaa sa ilang hurisdiksyon ang nahitabo.
Sumala pa ni Atty. Sarmen, limitado lamang ang mahimo sa gobyerno sa Pilipinas ug kini pinaagi sa embahada ug Department of Foreign Affairs. Ang ilang papel mao ang paghatag og legal nga tabang, pagpahibalo sa mga katungdanan sa mga dinakpan, pag-monitor sa kaso, ug paghangyo sa gobyerno sa Saudi Arabia nga paubsan ang silot.
Gidugang pa ni Atty. Sarmen nga lahi ang balaod sa Saudi Arabia kung itandi sa Pilipinas. Sa ilang nasud, posible ang silot kamatayon ilabi na kung adunay kalambigitan sa droga, samtang sa Pilipinas, padayon nga ilegal ang pagpahamtang sa death penalty.