Gipasabot ni Apollo Pacamalan, Director sa Department of Agriculture Region X, nga dunay mga hagit sa distribusyon sa P20 nga bugas, hilabina sa pagpangita og paagi nga makasiguro nga ang tinuod nga vulnerable sector ang makatagamtam sa maong programa.
Bisan pa man, aktibo ang kooperasyon sa mga ahensya sama sa DSWD, LGU, barangay, KADIWA partners, ug NFA aron masiguro ang organisado ug patas nga pag-apod-apod niini.
Gikinahanglan ang paglista sa pangalan sa mamalitay aron unay timailhan ug matino nga ang makadawat sa baratong bugas mao ang target nga benepisyaryo.
Sumala ni Pacamala, duna uban nga mga insidente nga makalusot nga dili sakop sa vulnerable sector, apan dali ra kini matrace pinaagi sa listahan ug koordinasyon sa lokal nga pagamhanan ug DSWD.
Kasamtangan, by schedule ang distribusyon sa bugas tungod kinahanglan pa kini hakuton gikan sa mga KADIWA partners, aron masiguro nga patas ang pag-apod sa barato nga bugas.
Giklaro usab sa DA nga ang tinguha sa programa dili lang makapahimulos ang mga benepisyaryo, apan usab makahatag og dugang kita sa mga mag-uuma pinaagi sa mubo nga gasto sa produksyon ug taas nga abot, samtang mapalig-on ang suplay sa bugas sa Northern Mindanao.