₱60–70 milyon ang collectibles o wala pa mabayrang buhis sa Real Property Tax (RPT) ang giilang nag-unang hagit karon sa kagamhanang lokal sa Malaybalay. Gipahayag ni Mayor Jay Warren Pabillaran nga kung kini makolekta, ang maong pondo dako og ikatabang sa pagpatukod og dugang mga classrooms ug uban pang mga proyekto sa imprastraktura.
Sa pakighinabi sa Bombo Radyo Malaybalay, gipasalig sa Mayor ang pagka-transparent sa pagdumala sa pondo sa siyudad. Gipasabot niya nga ang tanang procurement —gawas sa sweldo, honorarium, ug allowances—kinahanglan moagi sa bidding nga gidumala sa Bids and Awards Committee (BAC) aron masiguro nga walay mahitabong “kickback” o korapsyon.
idugang ni Pabillaran nga ang budget sa siyudad karong tuiga hapit na mokabat sa ₱2 bilyon. Samtang, gihulagway usab sa Mayor nga “hapsay ug paspas” na ang pag-renew sa mga permiso sa negosyo pinaagi sa gipakusgan nga Business One-Stop Shop.
Giawhag sa Mayor ang mga magbubuhis nga mobayad sa saktong panahon aron mapadayon ang paglambo sa serbisyo ug imprastraktura sa tibuok Dakbayan sa Malaybalay.