Nakadala og dakong kadaot sa ekonomiya ang padayon nga pagkumpiska sa mga sigarilyong smuggled, nga mitungas na sa halos ₱27 milyones ang kantidad sa sulod lamang sa tulo ka semana nga operasyon sa kapulisan sa Northern Mindanao.
Sa pakighinabi sa Bombo Radyo Malaybalay ngadto kang Police Major Joann Navarro tagpamaba sa Police Regional Office 10, nga seryoso ang PNP sa pagsikop sa smuggling, nga dugay nang problema sa rehiyon. Ilang gipatuman ang mas hugot nga operasyon ug surveillance ilabina sa mga lugar nga kasagarang agianan sa iligal nga kontrabando.
Matod pa ni Navarro, aduna na sab bag-ong pamaagi ang mga smuggler sa pagpasulod sa sigarilyo sa rehiyon pinaagi sa nagkalain-laing klase sa transportasyon aron malikayan ang mga otoridad.
Nagpadayon ang kampanya batok sa smuggling isip kabahin sa lawom nga estratehiya aron mapalig-on ang seguridad ug protektahan ang ekonomiya sa rehiyon.