Gibarogan ni Senate President Pro Tempore Ping Lacson nga dili basta-basta nga maaresto sa International Criminal Court (ICC) ang mga senador nga nalambigit sa kaso ni kanhi Presidente Rodrigo Duterte. Sumala ni Lacson, kinahanglan nga moagi una sa lokal nga korte ang bisan unsang arrest warrant gikan sa gawas sa nasud subay sa Konstitusyon.
Gipasabot sa Senador nga ang iyang baroganan dili pagpanalipod sa iyang mga kauban, kundi pagprotekta sa legal nga proseso sa Pilipinas. Matud niya, ubos sa Article 3, Section 2 sa Batakang Balaod, ang huwes sa lokal nga korte lamang ang naay gahom sa pag-ila kon duna ba’y lig-on nga rason (probable cause) para i-isyu ang warrant.
Lahi usab ang panglantaw sa Malacañang. Matud ni Palace Press Office Undersecretary Claire Castro, mahimong i-surender sa kagamhanan ang mga akusado pinaagi sa Interpol, sama sa nahitabo kaniadto. Nanawagan usab ang Palasyo nga sundon ang due process ug likayan ang bisan unsang kasamok kon ugaling ipatuman na ang pag-aresto.
Sa pagkakaron, wala pa’y opisyal nga warrant nga gipagawas ang ICC, apan nagpadayon ang imbestigasyon batok sa mga giingong “co-perpetrators” sa kontrobersyal nga War on Drugs.