Gilauman nga magsumite og tubag si Vice President Sara Duterte sa adlawng Lunes, Marso 16, kabahin sa duha ka impeachment complaints nga gisang-at batok kaniya human kini ideklarar nga adunay igo nga porma ug sulod.
Gipadayag ni House Committee on Justice member ug Bicol Saro Representative Terry Ridon, nga mahuman na karong weekend ang 10 ka adlaw nga gitakda sa komite aron tubagon sa Bise Presidente ang mga reklamo batok kaniya.
Sumala ni Ridon, kung makapasa og tubag si Duterte sa Lunes, hatagan usab og higayon ang mga mambabalaod nga nag-endorso sa impeachment complaints aron ipresentar ang ilang kabahin, ug human niini hatagan usab og panahon ang Bise Presidente sa pagsumite sa iyang rejoinder.
Dugang pa niini, nga kon makadawat og tubag ang komite, tukion dayon sa Justice Committee kung adunay “sufficient grounds” ang mga reklamo, ug gilauman nga himuon ang hearing proper sa Abril 8.
Gipasabot usab ni Ridon nga posibleng mumubo ang dagan sa impeachment process kon dili magsumite og tubag si Duterte sa gitakdang petsa.
Gipanghimakak usab sa mambabalaod ang alegasyon sa Bise Presidente nga usa lamang ka “fishing expedition” ang impeachment proceedings batok kaniya, ug miingon nga adunay igo nga dokumento nga basehan sa maong proseso.
Samtang, nakatakdang ipahigayon ang sunod nga pagdungog sa Justice Committee sa Miyerkules, Marso 18, diin hisgutan ang mosyon ni Chel Diokno kabahin sa posibleng conflict of interest sa duha ka abogado ni VP Sara nga sila Reynold Munsayac ug Michael Poa.