Nanawagan si bise Presidente Sara Duterte og hiniusang aksyon sa gobyerno ug komunidad aron makunhoran ang epekto sa padayon nga pagsaka sa presyo sa mga palalitunin ug produktong petrolyo nga nagpadugang sa kabug-at sa gasto sa daghang pamilyang Pilipino.
Gipahinumduman niini, ang mga lokal nga mga kagamhanan nga mahimong hunongon una ang pipila ka “non-essential” nga kalihokan nga makakonsumo sa lana, ug magtukod og komite nga magmonitor sa presyo sa bugas, mantika, pleti ug uban pang batakang panginahanglan aron mahatagan gilayog pahibalo ang publiko sa posibleng pagtaas sa presyo.
Giawhag usab niini, ang mga pamilya nga magmaampingon sa pagplano sa badyet, unahon ang mga kinahanglanon, mosuporta sa lokal nga produkto, ug ubsan ang paggamit sa enerhiya ug sakyanan aron makatipid.
Dugang pa ni bise-Presudente Duterte, nga responsibilidad sa mga ahensya sa gobyerno ang hugot nga pagbantay sa presyo, pagpugong sa hoarding ug sobra nga patong sa presyo, ug pagtan-aw sa posibilidad sa subsidiya o tabang pinansyal alang sa mga kabus nga pamilya.
Giila niini, nga pinaagi sa panaghiusa sa komunidad ug aksyon sa gobyerno, aron makalingkawas ang nasud ang kasamtangang hagit sa ekonomiya.