Gipatuman sa Valencia City Disaster Risk Reduction and Management Office ang mandatory ug forced evacuation kagabii sa mga lugar nga kanunay maapektuhan sa pagbaha sa syudad tungod sa padayon nga pag-ulan.
Sa eksklusibong pakighinabi sa Bombo Radyo Malaybalay kang June Ray Valero, Head Officer sa City Disaster Risk Reduction and Management Office, gipasalig niini nga andam ang buhatan sa pagpanalipod sa katawhan, hilabi na ang mga lumulopyo nga nagpuyo daplin sa Panlibatuhan Creek ug uban pang lugar nga labing naapektohan sa baha.
Matud ni Valero, nareactive na ang warning system sa maong mga lugar diin sa higayon nga madungog ang alarm, gikinahanglan nga magsaka dayon ug magmakwit ang mga residente aron malikayan ang posible nga peligro.
Hinuon, base sa impormasyong nakalap pasado alas 12 sa kaadlawon, wala’y natala nga casualty report ug wala usab evacuees, bisan pa man sa pagpatuman sa mandatory evacuation, tungod ang pipila sa mga residente nakapili muhikling sa mga kaparyentihan sa mas luwas nga lugar.
Lakip usab sa hugot nga gibantayan sa mga otoridad ang Pinatilan Creek, nga posibleng musaka ang lebel sa tubig tungod sa problema sa drainage, samtang padayon ang istriktong monitoring sa Pulangi River tungod sa posibilidad sa dugang nga pagsaka sa tubig.
Gipahimangnoan sa CDRRMO ang publiko nga magpabiling alerto, magpadayon sa pagpaminaw sa mga pahimangno sa lokal nga kagamhanan, ug mosunod sa mga direktiba aron malikayan ang posibleng mga peligro.