Gikumpirma sa Department of Migrant Workers nga usa ka overseas Filipino worker ang nasamdan sa usa ka insidente sa Kuwait International Airport taliwala sa nagkagrabeng tensyon sa Middle East.
Ang insidente nahitabo sulod sa airport complex nga nahimutang sa Farwaniya Governorate, duol sa Kuwait City, diin nadungog ang kusog nga pagbuto nga nakaapekto sa pipila ka trabahante sa lugar.
Sumala sa DMW, minor lamang ang samad sa Pilipino ug na-discharge na gikan sa balay tambalanan, samtang padayon ang paghatag og tabang ug psychosocial support pinaagi sa Philippine Embassy.
Kagahapon, gipahibalo sa ahensya nga wala pay mandatory repatriation tungod sa padayon nga pag-assess sa seguridad ug flight disruptions.
Kasamtangan usab nga gipasiguro nga lig-on ang koordinasyon sa mga ahensya sa gobyerno aron masiguro ang kaluwasan sa mga Pilipino sa Kuwait ug kasikbit nga mga nasud, samtang giandam ang contingency plans kung mosamot pa ang kahimtangan.