Mihulga si U.S. President Donald Trump sa pagpatuman og secondary sanctions batok sa mga nasud nga magpalit og lana ug ubang produkto gikan sa Russia.
Gibuhat sa Presidente sa Amerika ang maong pamahayag human niini nga ipahibalo ang pagpadala og Patriot missile system sa Ukraine, diin gi-emphasize nga ipatuman ang mga sanctions sa higayun nga dili mouyon si Russian President Vladimir Putin sa 50 ka adlaw nga ceasefire.
Matud sa pipila ka mga eksperto, tumong sa lakang ni Trump ang paghatag og mas dakong pressure sa Russia, nga nagpadayon sa pagkita gikan sa oil exports padulong sa China ug India.
Samtang gikalipay kini sa Kyiv, apan adunay pipila ka mga tawo nga nagduhaduha sa tinuod nga katuyoan ni Trump, nga kaniadto nga mabinantayon sa paghatag og suporta sa Ukraine.
Matod pa sa Presidente, nag-usab siya og baruganan tungod kay nadismaya siya kang Putin tungod sa padayo nga pagpang-atake niini sa Ukraine bisan pa sa mga panaghisgot alang sa kalinaw.
Naghatag si Trump og 50 ka adlaw nga ultimatum sa wala pa niya ipatuman ang mabug-at nga mga taripa ug silot.
Sa pikas bahin, nagpadayon ang gubat sa Ukraine nga naa na sa ika-upat ka tuig, diin kapin 20 porsyento sa teritoryo niini ang gihuptan sa Russia.