Usa ka makalingaw nga balita ang mikatap karon mao ang pagamit og tsupon sa mga batan-on lakip na ang mga hamtong, isip bag-ong pamaagi sa pagpahupay sa stress nga dala sa modernong kinabuhi.
Gikan sa trabaho, utang, hangtod sa problema sa gugma, ubay-uabay kanato ang nangita og paagi nga makapaminus sa kabug-aton sa hunahuna.
Ug kinsa bay magdahom nga usa sa mga tambal mao ang gamit nga sagad ra untang para sa mga bag-ong himugso o bata?
Gisugdan kini nga uso sa China, diin migikan ang trending nga mga video ug litrato sa mga batan-ong Intsik nga naggamit og tsupon bisan sa mga pampublikong lugar.
Tungod sa social media, gisundan dayon kini sa ubang nasud nga naigo pud sa samang problema, sama sa stress, kabalaka, ug insomnia.
Gibaligya karon ang mga tsupon isip “stress relief pacifiers” sa daghang online stores, uban sa marketing nga nagtumong sa mga batan-on ug stressed nga hamtong.
Sa tinuod lang, ang ubang tindahan makabaligya og libo-libong piraso matag bulan gumikan niini.
Gipatin-aw sa mga psychologist nga ang kalit nga pagsikat niini naggikan sa gitawag nga “regression phenomenon,” usa ka natural nga psychological response sa sobra nga stress.
Mubalik matud pa ang utok sa comfort behavior sa pagkabata, ug ang tsupon usa sa mga butang nga naghatag og kasigurohan ug kahupay sa panghunahuna.
Gipasundayag sa usa ka report sa Sohu nga daghan sa mga misulay niini ang misulti nga nabati nila ang kalma, nakatulog sila og maayo, ug napugngan ang ilang anxiety.
Apan, samtang gipahimuslan sa uban ang tsupon isip paagi sa temporaryong pahuway, gikinahanglan gihapon ang hustong pagsabot ug limitadong paggamit niini.